Azaroaren 13tik 26ra Maitasunaren geografiak izango ditu ardatz 2023ko Literaktumek
Literaktum letren jaialdiak azaroaren 13tik 26ra du aurtengo hitzordua. Sail eta proposamen berriekin eta, ohi denez, kolaborazio-sare zabalarekin gauzatuko da.
![](https://www.donostiakultura.eus/imgs/noticias/2023/11-azaroa/LITERAKTUM_PRENTSAURREKOA_2023_1200X800.jpg)
Maitasunaren geografiak du izenburu aurtengo literatura jaialdiak. Maitasuna, ulertzen ez dugun baina bizitzeko ezinbesteko dugun sentimendua. Izan ere, bizi al daiteke inolako maitasunik gabe? Maitasunak, maitasun ezak edo desamodioak emoziorik muturrekoenak eragin ditzake gizakiarengan eta sortzaileengan, sorkuntza iturri ere izan ohi dira.
Gaiaren harira, Literaktumen inguruan bilduko dira, Antonio Muñoz Molina, Ray Loriga, Marta Jiménez, Alejandro Gándara, Máximo Huerta eta Patxi Zubizarreta, euren azken lanetan azaltzen diren maitasun mota ezberdinen ñabardura eta garrantziaz aritzeko. Ramón Andrés, Gioconda Belli eta Antje Rávic Strubel ere izango dira Literaktumen.Literatura jaialdia liburu-dendetara itzuliko da, liburu-saltzaileekin duen lankidetza harremana sendotuz. Zubieta-TROA liburu-dendan izango dugu Jacobo Bergareche eta Elkar Aretoan berriz, Nerea Balda.
Modu batera zein bestera, urteurrenek ere lekua izango dute Literaktumen. Mikel Laboa sortzaile handia zendu zela 15 urte beteko dira abenduan, Jules Verneren Munduari bira 80 egunetan argitaratu zela 150 urte dira eta Euskal Irudigileen elkarteak, 20 urte bete ditu. Hiru erakusketek hartuko dituzte besteak beste, urtemuga hauek. Laugarren erakusketak aldiz, Surflaria komikia izango du oinarri.
Haur literaturan gertatzen ari den ipuinen berridazketaz mahai-ingurua, Patri Urkizu lagunartean saioa eta Irun Hiriko Kutxa Literatura sariak ere izango dira Literaktumen.
Literaktumek bestelako lengoaia eta diziplinekin elkarrizketan literaturara hurbiltzea du nortasun ezaugarria. Antzezlanek, literatur emanaldi musikatuak, Etxepare Euskal Institutuaren eskutik datorren Poesia(k) eta maitasuna(k) emanaldiak eta aurten ere Literaktum Txikiaren baitan Oninen abenturak gaitzat duen ilustrazio lehiaketak osatuko dute programa zabala.
Informazio gehiago: www.literaktum.eus